د. هدير سامي
أخصائية العلاج الطبيعي، إصابات الملاعب، التأهيل، والتغذية العلاجية
في الوقت اللي بيبحث فيه الجميع عن حلول سريعة لخسارة الوزن وتحسين الصحة، ظهر “الصيام المتقطع” كأحد أبرز الاتجاهات الحديثة في عالم التغذية. ملايين حول العالم اتبعوا النظام ده، وبيتم الترويج له على إنه “سر الرشاقة والصحة المثالية”، لكن هل فعلاً هو حل سحري؟ وهل يناسب كل الناس؟
ما هو الصيام المتقطع؟
الصيام المتقطع هو نمط غذائي بيتضمن التبديل بين فترات الأكل وفترات الصيام، ومن أشهر أنواعه:
• نظام 16/8: صيام 16 ساعة وتناول الطعام خلال 8 ساعات فقط.
• نظام 5:2: خمسة أيام أكل عادي، ويومين في الأسبوع بتناول سعرات حرارية قليلة جداً.
• نظام الأكل خلال ساعات محددة فقط.
إيه اللي بيخلي النظام ده ترند؟
• بيساعد على فقدان الوزن بطريقة طبيعية بدون حرمان.
• بينظم مستويات السكر والإنسولين في الدم.
• بيحفّز الجسم على استخدام الدهون كمصدر للطاقة.
• بعض الدراسات بتربطه بتحسين التركيز وتأخير علامات التقدم في السن.
الصيام المتقطع ورمضان:
بما إن رمضان هو صيام إجباري، ناس كتير بتحاول تطبّق الصيام المتقطع بشكل منظم خلال الشهر. لكن المشكلة إن ساعات الأكل قليلة، وفيه إغراءات كتير من الحلويات والمقليات، فممكن يكون فيه لخبطة في النظام وتأثيره.
هل يناسب كل الناس؟
الإجابة: لا. رغم فوائده، إلا إن الصيام المتقطع مش مناسب لبعض الفئات:
• مرضى السكر أو الضغط إلا تحت إشراف طبي.
• الحوامل والمرضعات.
• الأطفال والمراهقين في سن النمو.
• الأشخاص اللي بيعانوا من اضطرابات الأكل أو النحافة الشديدة.
نصائح مهمة لو هتجربي الصيام المتقطع:
1. ابدأي بشكل تدريجي، مثلاً نظام 12/12، وبعدين زودي الساعات حسب استجابة جسمك.
2. اهتمي بنوعية الأكل، مش بس بعدد الساعات. الجسم محتاج بروتين، ألياف، دهون صحية.
3. اشربي كمية كافية من المياه والسوائل.
4. اتجنبي الإفراط في الكافيين، لأنه بيزود الإحساس بالجفاف والتوتر.
5. راقبي جسمك، ولو حسّيتي بدوخة، إرهاق، صداع مستمر… راجعي أخصائي فورًا.
في النهاية:
الصيام المتقطع ممكن يكون أسلوب حياة صحي وفعّال لو تم بشكل علمي وتحت إشراف متخصص في التغذية العلاجية. مش كل ترند مناسب للجميع، والمفتاح الحقيقي لأي نظام ناجح هو التوازن والاستمرارية، مش الحرمان.
